Oranjestad, Aruba -18 di januari, 2018: E dianan 17 pa 22 di januari proximo, e seleccion di Aruba den e deporte di landamento lo tin nan prome compromiso internacional na Merca. Un total di 11 atleta a wordo escohi pa competi den e Union Americana de Natacion Cup cu lo tuma lugar e anja aki na Coral Springs, Florida. E competencia aki ta pa tur landador cu ta bini di e region y continente di America Central y Caribe como tambe Sur America. Mester bisa cu nos seleccion lo competi den tres categoria di age-group esta 11-12, 13-14, y 15-17. E grupo hubenil den e edad di 15-17 anja ta Elisabeth Timmer, Brandon Cheong y Daniel Jacobs, e tres atletanan aki ta haya subsidio pa e competencia mirando tambe cu nan ta den pleno preparacion pa nan clasificacion pa e Weganan Olimpico Hubenil Buenos Aires 2018.
Pa e ocho otro atletanan den e competencia aki nan lo debuta den un prome competencia grandi internacional manera UANA y alabes ta fungi como un bon preparacion e proximo Carifta Games. Esnan cu lo competi den e categoria 11-12 anja lo ta Braynsly Dirksz, Gavin Kock, Jaydon Croes, Ronald Fun, Giancarla Larez y Michaline de Cuba. Den e categoria 13-14 anja lo competi Gabriela Gordon mientras Nathan Croes lo competi den 15-17 anja. Como coach nos lo tin Ismael Santiesteban y miembronan di e delegacion Daniel Jacobs Sr, Gislaine Croes y Marion Kan.
Remarcabel ta cu e atletanan cu competi na e UANA Cup 2018 lo tin e posibilidad di clasifica pa weganan importante den nos region y continente manera e Weganan Centro Americano y del Caribe 2018 di Barranquilla, Colombia, Weganan Odesur 2018 na Cochabamba, Bolivia, Weganan Olimpico Hubenil 2018 na Buenso Aires, Argentina y e Weganan Panamericano 2019 di Lima, Peru.
Un danki sigur na Lotto, e Loteria di Aruba pa medio di Stichting Sportsubsidie Aruba cu a subsidia e atletanan Elisabeth Timmer, Brandon Cheong y Daniel Jacobs pa e UANA CUP 2018 na Coral Springs, Florida, Merca.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
