ORANJESTAD, Aruba – 16 di april 2013: Den e fin di siman di 22 pa 24 di maart ultimo, Aruba tabata anfitrion di e Campeonato Sur y Centro Americano y del Caribe Masters 2013, unda cu a conta cu participacion di 7 pais y Aruba mes. Lotto tabata patrocinado di e evento deportivo aki y a keda hopi contento cu e resultado di Aruba, unda cu e atletanan a logra gana 8 medaya; 4 medaya di oro, 3 medaya di plata y 1 medaya di brons. Aruba Amateur Weightlifting Association a organisa e evento aki, cu a tuma luga den Compleho Deportivo Frans Figaroa y unda e 8 paisnan, den representacion di nan atletanan, a competi contra otro; Corsou, Ecuador, El Salvador, Guyana, Puerto Rico, Santo Domingo, Venezuela y Aruba mes. Tabatin varios invitado presente; Minister di Salubridad y Deporte, dr. Richard Visser, Secretario General di Comite Olimpico Sra. Nicole Hoevertzs, Presidente di Aruba Sport Unie Sr. Gerald Franca y ultimo Sr. Hugo Themen presidente di Aruba Amateur Weightlifting Association.
Tambe tabatin participacion di 13 atleta femenino, unda varios di nan a logra kibra record Centro Americano. Despues cu e hisadonan di peso femenino a termina nan competencia, e grupo di masculino a duna inicio na nan competencia, di edad 50 pa 80+, unda tabatin participacion di 17 atleta. Aki tambe varios atleta a logra kibra record Sur- y Centro Americano. Hugo Themen a logra gana medaya di oro den su categoria.
Den e grupo di edad 40 – 44 y 45 – 49, Aruba tabata presenta pa e atleta Anthony Martinus, hunto cu 11 otro hisado mas di peso. Anthony tambe ta logra medaya di oro den su categoria. Den e grupo di edad 35-39, Aruba ta logra un medaya di brons, den persona di Herve Ruiz.
Den e categoria cu Aruba tabatin mas participante, esta 30-35 aña, unda tabatin 5 atleta; Endel Kock, Jorge de Sousa, Darvin Raphaela, Patrick Vrolijk y John Henriquez. Jorge de Sousa ta logra medaya di brons, Endel Kock, cu ta hisa pa prome biaha, ta logra gana medaya di plata y por ultimo, Darvin Raphaela, ta gana medaya di oro y ta logra kibra 6 record Sur- Centro Americano, cu tabata riba nomber di e atleta Venezolano, J.Silvera. John Henriquez tambe ta logra gana medaya di oro pa Aruba.
Lotto, e loteria di Aruba, cu ta contribui enormemente cu deporte na Aruba, ta manda palabra di pabien na Hugo Themen, Anthony Martinus Darvin Raphaela, Endel Kock, Jorge de Sousa, Patrick Vrolijk, Herve Ruiz y John Henriquez cu nan medayanan obteni y ta motiva nan pa sigui cu e tremendo trabou deportivo cu nan ta haciendo.
Lotto, e loteria di Aruba tin 7 diferente wega; Catochi, Big 4, Zodiac, Lotto di Dia, Lotto 5, Mini Mega y Wega di Number Korsou. Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su ganadonan y na mes momento inverti den deporte local pa medio di donacionnan na e comision di subsidio.
{gallery}joomgallery/originals/aruba_amateur_weightlifting_association_24{/gallery}
