ORANJESTAD, Aruba 19 di Juni 2013: E deporte di dam no ta uno desconoci na Aruba. Desde hopi tempo caba, tabata consider'e un wega di mesa, unda cu e alumnonan tabata hunga sea na scol of den seno familiar. Pero poco poco e wega di dam a drenta den e mundo deportivo y actualmente e ta masha popular y conoci na varios pais, specialmente ora di competencia.
Recientemente Lotto, e loteria di Aruba, a forma parti di ABC-Tournament 2013, cu a tuma luga na Playa Linda Lounge y a conta cu un bon participacion di hungado experto di dam. E ta un wega cu tambe ta bin cu su regla- y strategia, unda cu e hungado mester train hopi pa por gana su contricante, poniendo e obstaculonan adecuado. Poco poco e deporte aki ta hayando mas atencion di nos hobennan y e ta birando popular tambe ta Aruba y Lotto, cu semper ta enfoca riba subsidio pa tur tipo di deporte, ta apoya e deporta aki tambe.
Durante e final di e ABC-Tournament 2013, Corsou a termina na prome luga cu 11 punto, Boneiro na di dos luga cu 10 punto y Aruba na di tres luga cu 3 punto. E resultado individual ta: na prome luga, Clifton Agata di Corsou, di dos luga Marvin Leocaria tambe di Corsou y di tres luga, Norwin Lau di Boneiro cu 7 punto. E hungado Clifton a hunga na borchi 1 y a keda na prome luga y pa por a kibra e empate entre Marvin y Norwin, a hunga un extra wega di 3 minuut y 2 seconde. Despues di e wega intensivo aki, Marvin Leocaria a logra gana e partido aki y obtene e titulo di di dos luga.
Lotto ta hopi satisfecho cu e prestacion di e atletanan di Aruba y ta sigur cu esaki tabata un tremendo experiencia pa nan. Awo nan lo sigui traha riba nan tecnica y plan di wega completo pa por sigui competi den e competencianan den exterior y na Aruba mes.
Lotto, e loteria di Aruba tin 7 diferente wega; Catochi, Big 4, Zodiac, Lotto di Dia, Lotto 5, Mini Mega y Wega di Number Korsou. Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su ganadonan y na mes momento inverti den deporte local pa medio di donacionnan na e comision di subsidio.
