ORANJESTAD, Aruba – 2 di Oktober 2014: Den e fin di siman tras di lomba, varios atleta di Aruba a competi den campeonatonan internacional di deporte, algun den e region di Caribe y otronan na Sur America. E mayoria di biahanan aki ta danki na Lotto, e loteria di Aruba kende ta kere fielmente den e prestacion di nos atletanan local. Engrandece e conocemento deportivo dor di participa den competencianan internacional lo amplia y alabes hisa e nivel di nos atletanan y nan coachnan.

Mas ainda e ta yena uno cu orguyo y satisfaccion pa mira nos atletanan para riba podium internacional durante di premiacion. Den weekend cu a pasa, un bes mas esaki tabata e caso ora cu nos atletanan di Pesas a logra varios medaya na Puerto Rico. E atletanan Jennifer Piter, Darvin Raphaela, Joel Kuiperi, y Carell Lopes a presta sublime den e campeonato Criollo Cup International na Puerto Rico, unda nan a logra gana varios medaya. Nos atletanan a logra gana den e disciplina nan di snatch y clean & jerk.

E atleta femenino, Jennifer Piter a logra 3 medaya di Oro den e categoria 63kg. Jennifer a logra snatch 72 kg y 95 kg den C&J pa un total di 167 kg. Cu esaki Jennifer a kibra record na Puerto Rico den clean & jerk cu e 95 kg den categoria 63 kg. E atleta Carrel Lopez di 15 aña a competi pa prome biaha den un campeonato internacional. E ta snatch 40 kg y 51 kg den C&J pa un total di 91 kg, cu e esaki e ta logra conkista 3 medaya di Plata. Carrel a competi den categoria 56 kg. E atleta Darvin Raphaela competi den 94 kg unda e ta snatch 92 kg y clean & jerk 127 kg pa total di 219. Cu esaki Darvin ta logra gana 3 medaya di brons. Por ultimo e atleta Joel Kuiperi di 18 aña tambe ta competi pa prome biaha internacionalmente unda e ta snatch 98 kg y clean & jerk 130 kg pa total di 228 kg. Cu esaki Joel ta logra gana tres medaya di Plata. Resumiendo e campeonato por bisa cu nos atletanan di pesas a logra un total di 12 medaya, 3 Oro, 6 Plata y 3 Brons