ORANJESTAD, Aruba – 6 di Oktober 2014: Tanto diasabra como diadomingo nos ciclistanan a competi den e di 9 edicion di Junior Caribbean Cycling Championship 2014 cu a tuma luga e aña aki na e ciudad di Paramaribo, Surnam. Esaki un bes mas ta danki na Lotto, e loteria di Aruba kende ta kere fielmente den e prestacion di nos atletanan local.

Cinco ciclista di Aruba a participa na e competencia aki bou guia di coach Ervis Benitez. Diasabra durante di e 'careda contra holoshi', e ciclista femenino Cherley van den Linden a logra gana un di tres luga y un medaya di brons pa Aruba den e disciplina aki. Un tremendo prestacion di e atleta Cherley van den Linden kende ta bolbe triunfa den un campeonato di Caribe. E otro competido femenino di Aruba, esta Oriana Thielman a keda na di cuater luga, mientras den e categoria junior, e ciclista Eugene Dirksz tambe a keda na di cuater luga.

Diadomingo mainta tabata e competencia riba ruta y aki un bes mas e ciclista femenino, Cherley van der Linden a demostra cu e ta un di e miho nan den Caribe, ora e ta finalisa na di tres luga y asina bolbe triunfa cu un medaya di brons pa Aruba. Esaki a bira Cherley su di dos medaya di brons den e competencia aki. Despues tabata e ciclistanan masculino kendenan mester a midi forsa contra di otro y aki e ciclista Jonathan Croes a logra sorprende y ta termina na di dos luga, bon pa un medaya di plata den e careda di ruta.

Mester bisa cu Jonathan a lidera casi henter e careda, pero na ultimo a ser pasa pa e hoben di Trinidad and Tobago.
Un prestacion sublime sin duda algun di tur nos ciclistanan Gabriel Thielman, Jair de Santiago, Eugene Dirksz, Jonathan Croes, Cherley v/d Linden y Oriana Thielman kendenan a competi na e Junior Caribbean Cycling Championship 2014, unda Aruba a logra obtene 3 medaya.