ORANJESTAD, Aruba – 8 di Oktober 2014. Un bon iniciativa semper mester por contribui cun'e, sigur si e ta na bienestar di e formacion y desaroyo di nos muchanan. Awendia ta hopi importante conscientisa nos hobennan cu practica cualkier deporte ta importante pa e curpa humano, esaki pa e salud y pa ta un miho persona semper.

Awo cu nos ta den e temporada di vacacion escolar atende camponan di deporte ta mas cu bon bini. Pa e motibo aki, South League bou guia di sra. Glenda Thomasia a bini cu e iniciativa pa organisa un campo di entrenamento di baseball pa tur mucha den e edad di 9 – 12 aña esaki na Nadi Croes/Crismo Angela na Winston. Durante cuater dia largo tur mucha por cera conoci cu e deporte di baseball y siña con ta hunga e deporte di baseball bou guia di manager, coachnan como tambe hungadonan cu ta bon den e deporte. Tambe e peloteronan cu ya caba ta hunga baseball pero cu kier siña un poco mas "skills" den e deporte a atende e campo di entrenamento.

E bunita ta cu mas di 80 mucha a atende e campo di entrenamento durante e cuater dianan. Mirando e costonan pa organisa un campo asina ki, Lotto, e loteria di Aruba pa medio di Comision di Subsidio a subsidia un parti di e campo di entrenamento di baseball pa nos muchanan.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.