Na Aruba e deporte a bira uno masha gusta mes bou di nos hobennan, mientras cu e federacion di volleyball, AVA sa organisa torneonan di beach volleyball pa asina atrae mas hoben practica e deporte di playa aki. Ya pa sigur un aña y mei, e duo di beach volleyball mas conoci na Aruba esta Mitchell Daniel y Eargenell De Cuba ta participando na e circuito di NORCECA, cual ta un competencia di beach volleyball regional. E duo Arubano ta rank den e top 10 miho hungadonan di Caribe y ta lucha pa subi den e ranking aki.
Un danki sigur na Lotto, e Loteria di Aruba pa medio di Comision di Subsidio cu ta subsidia e biahe di e duo di beach volleyball den e circuito di NORCECA. Ta importante pa keda inverti den nos atletanan local pa asina nan por gana e experencia den e diferente competencianan den exterior. Esaki ta un forma pa nos atletanan por keda midi nan nivel di desaroyo compara cu e otro atletanan di e islanan den nos region/continente.
E duo Mitchell Daniel y Eargenell De Cuba a competi e biaha aki den e Circuito NORCECA na Chula Vista, USA unda nan a enfrenta e miho nan den e continente aki. Na Chula Vista, e duo di Aruba den un bon bataya ta perde contra di e campeonnan di e circuito NORCECA esta May/Dearing di Canada cu score preta di 21-18 y 21-16. Asina mes e duo Daniel y De Cuba a sa na gana un wega di consolacion for di e duo Boneriano, Prudencia/Sillie cu e score di 21-3 y 21-3. Den luna di november proximo e duo Daniel y De Cuba lo representa Aruba den e Weganan Centro Americano y del Caribe na Veracruz, Mexico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
