ORANJESTAD, Aruba – 8 di October 2014. Durante di e vacacion escolar aki varios di nos atletanan local a biaha pa exterior unda nan a competi den diferente torneo y/of campeonatonan organisa den nos region. Aki no por keda sin gradici Lotto, e Loteria di Aruba cu pa medio di Comision di Subsidio ta subsidia e biahe di nos atletanan. Un di e delegacionnan cu sin duda a presta bon y gana mayoria di e premionan disponibel ta tennis di mesa kendenan a competi den e torneo internacional "Dutch Antilles Youth Tournament" na nos hermana isla di Corsou.

Mester bisa cu nos muchanan a logra yega den tur wega di final y a gana tur contra di Corsou, Boneiro y Aruba mes. Nos muchanan a competi den e categorianan di pre-cadet (U-13), cadets ( U-15) y juniors (U-18). Notabel ta cu Aruba a logra pa cu e prome luga den team y a conkista tur e medayanan di Oro disponibel den tur e categorianan menciona.

E hungadonan cu a cay den premiacion individual tabata Chen Ho Chueng cu a sali campeon, Sjoerd Geurtsen tambe a sali campeon, mescos cu Jean Claude Hoek campeon, e hoben Donald Yarzagaray a sali sub campeon, Zhao Xi a sali campeon, Jean Pierre Helmeyer a sali sub campeon y Jeandry Mathilda a sali sub campeon. Tanto Mikayla Mathilda, Jeremy Ras, Bob Chueng, Michell Kelly y Jonathan Parades sea a sali na di tres luga den e competencia individual of a conkista e prome luga den team hunto cu nan otro compañeronan di Aruba.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.