Tur aña Aruba ta sede di diferente torneo deportivo internacional unda paisnan den nos region ta bin y competi hunto cu esunnan di Aruba mes. Aki no por keda sin gradici Lotto, e Loteria di Aruba cu pa medio di Comision di Subsidio ta subsidia e torneo internacional di ajedrez.
Durante e dianan di 9 pa 12 di October, Centro di Bario y Deporte Dakota lo ta e cas di e Federacion di Ajedrez Aruba cu lo ta organisando su torneo anual "Aruba Chess Challenge". E ta un torneo cu e federacion di ajedrez ta organisa anualmente y e aña aki lo tin participacion di hungadonan for di Corsou, Boneiro, Surnam y hasta Alemania.
E torneo lo ta uno di 7 rond y lo wordo hunga den 3 categoria esta "Open Group" cu premionan efectivo. Tambe lo tin un categoria U-18 y U-12.
