ORANJESTAD, Aruba – 16 di october 2014. Falta un luna mas pa e inicio di e Weganan Centro Americano y del Caribe na Veracruz, Mexico. Nos atletanan di Aruba ta den pleno preparacion pa cu e weganan aki unda e atletanan tur dia ta entrenando duro pa asina nan ta mas miho posibel prepara pa asina bataya entre e miho nan atletanan den e region aki. Un di e deportenan cu ta den pleno preparacion ta esun di Beach Volleyball. Actualmente e atletanan Eargenell de Cuba y Mitchel Daniel ta entrena dos bes pa dia duro ariba e aspectonan di fisica y condicion.
Den e cuadro pa hiba un preparacion debido cu mas wega di competencia prome cu e Weganan CAC, ambos atleta lo biaha pa Habana, Cuba unda nan lo atende un campo di entrenamento di beach volleyball na dicho pais. Un danki sigur na Lotto, e Loteria di Aruba pa medio di Comision di Subsidio cu ta subsidia e biahe di e duo di beach volleyball pa cu e campo di entrenamento na Cuba. Ta importante pa keda inverti den nos atletanan local pa asina nan por gana mas experencia den exterior. Midi e nivel di nan propio desaroyo den e deporte compara cu e otro atletanan den nos region ta algo esencial. Aki bo ta mira realmente con bon bo ta den e deporte dor di participa na e weganan di fogeo.
E atletanan lo entrena bou di profesionalnan Cubano pa asina hiba un miho nivel di preparacion den e deporte di playa. Tambe lo hunga weganan di competencia contra di algun duo Cubano. E atletanan Eargenell de Cuba y Mitchel Daniel lo permanece for di dia 16 di october 2014 te cu dia 10 di november 2014 na Cuba.
