Oranjestad, Aruba - 11 di maart, 2015: Den e siman binidero, docentenan di Movecion y Salud di IPA, Maximo Wernet y Peter Simon lo atende e seminario 2015 Shape America National Convention & Expo. E meta di e seminario ta pa sigui e desaroyonan nobo y ideanan innovativo relaciona cu educacion, movecion, y salud.

Ideanan cu lo revitalisa e enseñanza y mehora e calidad di siñamento di cada studiante. E topiconan principal lo ta Salud na scol, Deporte, Investigacion, Educacion Fisica, Actividad fisico, Bula cabuya pa e curason/Hulahoop pa e curason. E seminario Shape America National Convention & Expo ta wordo organisa anualmente na Merca unda miles di persona specialisa den movecion, educacion y salud ta bishita esaki, sea pa keda na haltura di e desaroyonan nobo y/of pa amplia nan conocemento riba e materianan menciona. E seminario lo tuma luga den e Washington State Convention Center na Seattle di 17 pa 21 di maart.

Un danki sigur na Lotto, e Loteria di Aruba pa medio di Comision di Subsidio cu a yuda contribui na e subsidio pa asina docentenan Wernet y Simon por atende e seminario 2015 Shape America National Convention & Expo.