Oranjestad, Aruba - 10 di maart, 2015: Despues di algun luna di preparacion intensivo, porfin e dia ta spera a yega pa tur e atletanan nomina pa Premio Excelencia den Deporte 2014. E aña aki un bes mas, Ministerio di Deporte encabesa pa Minister di Salubridad Publico y Deporte, Dr. Alex Schwengle y Lotto, e loteria di Aruba lo host e magno evento cu lo tuma luga diabierna 27 di maart den e mahestuoso ballroom di Marriot Aruba Resort & Stellaris Casino.

Durante di e bunita anochi aki Aruba su miho atletanan di aña 2014 lo bini hunto y celebra e anochi di gala aki dedica specialmente na nan. E diferente nominadonan den cada categoria tanto femenino como masculino ta conoci mescos pa e categoria mas importante di e anochi, esta Atleta di Aña 2014.

Tur invitado ta ser pidi pa ta 7or di anochi na Ballroom di Marriot Aruba Resort & Stellaris Casino mientras e evento mes ta programa pa cuminsa 8or exacto. Aña pasa, e bolichera Kamilah Dammers di ARBAS a keda como Aruba su Atleta di aña 2013. Tur hende ta ansioso pa sa ta kende lo bira Aruba su atleta di aña 2014, mirando cu e prestacion y reconocimento di e atletanan nomina ta di nivel halto.

Un danki sigur na Lotto, e Loteria di Aruba pa medio di Comision di Subsidio cu lo subsidia e evento di Gala Premio Excelencia den Deporte 2014.