Oranjestad, Aruba - 30 di april, 2015: Despues cu na comienso di luna di april, algun atleta den e deporte di bowling a atende un campo di entrenamento na e mundialmente conoci Kegel Training Center na Orlando, Florida, diahuebs ultimo un otro delegacion di bowling a bolbe sali pa Merca pa asina entrena na e famoso acomodacion di bowling aki. E atletanan Jason Odor, Bryan Helmeyer y Renald Thiel a biaha pa Orlando unda nan lo permanence pa un algun dia na Kegel Training Center y entrena bou guia di coach James Porter y otro coachnan experiencia di nivel internacional.
Na banda cu e entrenamentonan lo bay ta uno intensivo, e atletanan lo traha tambe riba algun aspecto tecnico y tactico. Tambe nan lo traha riba e consistencia di wega, movecion di bala, traha den team y e parti mental.
Un danki sigur na Lotto, e Loteria di Aruba pa medio di Comision di Subsidio cu a subsidia e atletanan di bowling pa asina nan por atende e campo di entrenamento na Kegel Training Center.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
