Oranjestad, Aruba – 6 di mei, 2015: E dianan 2 pa 10 di mei proximo, Aruba Amateur Weightlifting Association lo tin un otro compromiso internacional cu un di su atletanan prospecto den e deporte di hisamento di peso. E atleta Joel Kuiperi lo competi den e Junior Pan-American Weightlifting Championships cu lo tuma luga na Cartagena de Indias, Colombia. E atleta Kuiperi lo competi den e categoria di 105kg.
Mester bisa cu apesar di su edad hoben y apenas algun tempo formando parti di e deporte di pesas, e atleta Joel Kuiperi a sa na desaroya su mes den gran forma. Ya caba e la bira un di e miho nan den e categoria di 105kg y ta entrena cu hopi disciplina. Varios di e competencianan local organisa pa e federacion di hisamento di peso, AAWA, Joel a triunfa cu e prome luga. E entrenador colombiano, Adolfo Gallego sigur ta hopi satisfecho cu e atleta Kuiperi y ta mira un bunita futuro pa e atleta Arubano den e deporte aki.
Durante di e Junior Pan-American Weightlifting Championships na Cartagena, e atleta Arubano lo mester midi forsa contra di e fuerte competidonan di entre otro Argentina, Brazil, Barbados, Bolivia, Canada, Chile, Republica Dominicana, Ecuador, El Salvador, Guatemala, Guyana, Honduras, Peru, Panama, Trinidad and Tobago, Venezuela, Merca, Colombia, y Aruba.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e atleta Joel Kuiperi y entrenador Gallego pa e Junior Pan-American Weightlifting Championships na Cartagena, Colombia.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
