Oranjestad, Aruba - 11 di juni, 2015: Dentro di algun dia un delegacion di bowling ta sali pa e ciudad di Panama City, Panama unda nan lo ta competiendo na e Campeonato Panamericano Hubenil di Bowling. E campeonato lo tuma luga e dianan 27 di juni te cu 3 di juli.
E delegacion di bowling lo representa Aruba den dos diferente categoria esta e Sub 21 cu ta consisti di e hungadonan masculino Bryan Helmeyer, Yannick Roos, Elias Halabi y Anthony Tjin Kong Fat. E hungadonan femenino U-21 lo ta Shakaina Guerrero y Jeadine Ludens. Tambe a biaha e categoria di Sub 16 cu a consisti di e hungadonan Renald Thiel y Jair Kelly, mientras como coach lo biaha Jim Porter. Mester bisa cu Aruba lo enfrenta e miho hungadonan hubenil di bowling den e continente Panamericano.
Paisnan participante ta Argentina, Brazil, Colombia, Chile, Peru, Uruguay, Merca, Canada, Puerto Rico, Santo Domingo, Corsou, Jamaica, Cuba, Virgen Island y Aruba. Despues di un preparacion intensivo, e bolicheronan di Aruba ta bon prepara pa e reto cu ta warda nan na Panama. Den e ultimo añanan e deporte di bowling ta esun cu mas a sobresali pa Aruba den e weganan regional y continental, varios medaya a wordo logra pa nos pais. Aña pasa Kamilah Dammers a haci historia pa Aruba den e Weganan Centro Americano y del Caribe logrando un medaya di oro y un di plata. Recientemente nos a mira con e atleta Thashaina Seruas a logra un tremendo resultado hunto cu su scol na Merca.
Un danki sigur na Lotto, e Loteria di Aruba pa medio di Comision di Subsidio cu a subsidia e participacion di nos atletanan di bowling den e Panamericano Hubenil di bowling na Panama.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
