Oranjestad, Aruba - 15 di juni, 2015: Den e weekend tras di lomba, e atleta elite di salto largo, Quincy Breell a sali pa Lima, Peru, unda e la competi den e Grand Prix de Atletismo. Despues cu algun siman atras Quincy a realisa un tremendo actuacion na Cartagena, Colombia unda e la logra bula un record personal y alabes nacional di 7.72 meter den salto largo, un otro reto a spera e atleta Arubano.
E biaha aki Quincy a participa den e Grand Prix de Atletismo hunto cu otro 25 fuerte competidonan di Brasil, Venezuela, Ecuador, Puerto Rico, Costa Rica, Argentina, Chile y Colombia. Na Lima, Quincy simplemente kier mehora su marca di 7.72m den salto largo y sigura su posicion pa loke ta e Weganan Panamericano di Toronto, Canada. Un bes bek na Aruba, Quincy lo sigui entrena y traha duro pa e proximo competencia cu lo ta na Bahamas e dianan 26 – 28 di juni.
Un danki sigur na Lotto, e Loteria di Aruba pa medio di Comision di Subsidio cu a subsidia e atleta di salto largo Quincy Breell pa cu e Grand Prix de Atletismo na Lima, Peru.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
