Oranjestad, Aruba – 15 di juni, 2015: Recientemente e atleta den e deporte di triatlon Renze Postma a biaha pa Bogota, Colombia, unda e lo atende un campo di entrenamento esaki como preparacion pa e Weganan Panamericano como tambe e Aruba Int'l Triathlon. Pa mas di dos siman largo, Renze lo keda Bogota unda lo traha duro riba su tres disciplina nan esta landa, core bicicleta y core na pia. Mirando e altitud di Bogota, Renze lo mester adapta un poco na esaki. Den pasado ya caba Renze a atende un campo di entrenamento na Colombia.
E atleta di aña local di 2014, sigur conoce un crecemento den e deporte di Triatlon unda e la sa na crece y bira un di esunnan di miho na Aruba apesar di su edad hoben ainda. Den mayoria competencia local Renze a sa na triunfa cu un prome luga, mientras den competencianan internacional den nos region e ta duna bataya fuerte logrando un bon puesto entre e grandi den triatlon Sur Americano, Centro Americano y Caribe.
Renze ta trahando duro pa logra su soño esta di yega e Weganan Olimpico di Rio 2016. Aunke cu e sa e meta aki no lo bay ta uno facil, pero cu perseverancia y determinacion e lo purba haci todo lo posibel pa esaki bira un realidad.
Un danki sigur na Lotto, e Loteria di Aruba pa medio di Comision di Subsidio cu a subsidia e atleta Renze Postma pa cu e campo di entrenamento na Bogota, Colombia.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
