Oranjestad, Aruba - 18 di juni, 2015: Diadomingo 28 di juni proximo, Aruba Triathlon Association lo organisa su di 29 edicion di e Aruba International Triathlon cu lo conta un bes mas cu participacion internacional cu atletanan di paisnan manera Venezuela, Colombia y Curaçao sin lubida nos propio atletanan local.
Aña pasa un total di 114 atleta a inscribi pa e evento aki y tur cos ta mustra cu lo supera e cantidad ey. Mester bisa cu por competi riba e distancia Olimpico cu ta 1500 m landa – 40 km core bicicleta – 10 km core na pia, mientras e distancia di Sprint lo mester landa 750 m – core bicicleta 20 km – 5 km core na pia. Lo competi den e categorianan individual, duo y estafette. E evento ta programa pa cuminsa pa 6:30 di mainta na Eagle Beach.
E deporte di Triatlon a crece na Aruba unda mas y mas hoben como tambe adulto ta practica e deporte aki considera como un di esunnan mas pisa, mirando cu ta tres disciplina den un deporte. Notabel ta cu e triatleta local Renze Postma sigur ta un di e faboritonan pa triunfa den e Aruba International Triathlon. E atleta di aña local 2014 ta den bon forma.
Un danki sigur na Lotto, e Loteria di Aruba pa medio di Comision di Subsidio cu a subsidia e di 29 edicion di e Aruba International Triathlon.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
