E atleta Mata tin hopi experencia internacional unda na 2012 e la representa Aruba den e Weganan Olimpico di London. Durante di e campeonato aki e atleta Jayme Mata lo cuminsa busca su puntonan pa loke ta e clasificacion pa Weganan Olimpico 2016 otro aña teni na Rio de Janeiro, Brazil. E atleta Jayme Mata lo competi den categoria di 66kg. Su coach e biaha aki lo ta e ex-atleta y awo coach Fiderd Vis. E federacion di judo ta mira e importancia pa e progreso deportivo di su atletanan di judo, unda ta purba di logra haya mas hopi torneonan di fogeo y campeonatonan di nivel halto den exterior.
Un danki sigur na Lotto, e Loteria di Aruba pa medio di Comision di Subsidio cu lo subsidia e biahe di e judoka Jayme Mata pa e Open Panamericano di judo na San Salvador, El Salvador.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
