ORANJESTAD, Aruba - 27 di augustus, 2015: Renobacion di e compleho deportivo multi funcional Joe Laveist Ballpark ta den su fase final y ta cla pa oficialmente wordo inaugura dentro di algun siman. E facilidad deportivo di Joe Laveist lo bira un compleho deportivo y alabes recreativo multi-funcional.
Den e prome fase a drecha e luznan, mientras den e di dos fase a ocupa pa drecha henter e facilidad, a traha un tribuna nobo y un cancha di baseball y futbol ultra moderno unda a pone e tapijt di yerba artificial. A amplia e espacio tur caminda mientras a renoba ambos dugout. Por ultimo a haci un inversion cuantioso pa asina e facilidad por dispone di un scoreboard super moderno y un fence movibel den outfield. E scoreboard cu a keda instala den e centro di e stadion y den outfield sigur ta uno grandisimo cu por ser mira for di un distancia leu. E bombionan ta led y sigur moderno como tambe duradero cu lo gasta menos coriente.
Un danki sigur na Lotto, e Loteria di Aruba pa medio di Comision di Subsidio cu a subsidia e scoreboard nobo di Joe Laviest Ballpark.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
