ORANJESTAD, Aruba - 2 di september, 2015: Cu un total di 48 medaya conkista durante di e World Games na Los Angeles, e delegacion di 26 atleta di Special Olympics Aruba a regresa cas bek satisfactoriamente. Bou di un entusiasmo grandi, henter e delegacion a ser spera pa un grupo di famia, amigo y conocirnan kendenan a duna e delegacion su merecido bon bini na nos isla. Durante di un periodo di casi dos siman largo, e atletanan di Special Olympics Aruba a bataya contra otro atletanan special rond mundo den e diferente ramonan di deporte.
E World Games 2015 tabata un di esnan mas grandi organisa te cu awor unda alrededor di 7000 atleta rond mundo a participa na dje. Di e 48 medayanan conkista un total di 12 di nan tabata e color maximo esta Oro, mientras a logra un total di 16 di Plata y 20 di Brons. Notabel ta cu Aruba tabata number uno di henter e islanan Caribense cu mas medaya a conkista. Esaki sigur ta un tremendo presentacion sin duda algun. Es mas, nos atletanan di Special Olympics a haya varios premio extra pa nan esfuerso durante di e World Games. Nos atletanan a bataya den e deportenan di badminton, boliche, futbol, landamento, atletismo y bolas criollas.
Un palabra di pabien di parti di Lotto, e Loteria di Aruba na primeramente e atletanan di Special Olympics Aruba kendenan un bes mas ta saca cara di Aruba den exterior. Tambe ta felicita e coachnan cu a prepara e atletanan pa e evento di World Games y e lidernan di grupo cu a compaña e atletanan den e magno evento aki. Lotto ta contento di por a duna su contribucion na e organisacion di Special Olympics Aruba.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
