ORANJESTAD, Aruba - 17 di september, 2015: Pa mas di dos siman y mei, un delegacion di Aruba den e deporte di bodyboard lo permanece na e pais di Portugal unda nan lo competi den e dos diferente competencia organisa pa e asociacion mundial di bodyboard profesional, A.P.B. E atletanan di Aruba lo competi den e APB World Tour esta Sintra Pro 2015 y Nazare Pro 2015 ambos organisa pa e Association of Professional Bodyboarders.
Mas cu claro Aruba lo hiba su miho atletanan pa e competencia mundial aki mirando e nivel halto di e competidonan rond mundo cu tambe lo yega Portugal pa ambos evento. Mester bisa cu Aruba lo wordo representa pa e atleta Jeremy Loefstok cu lo competi den e Men's Open Division y Dropknee Division, tambe nos tin Joshue Kelly cu lo competi den e Men's Open Division y Anthony Wever cu tambe lo bataya den e Men's Open Division. E biaha aki Aruba lo competi den e clase junior unda e hoben Jayfrem Croes lo competi den e asina yama Junior Division como tambe Dropknee Division. E prome competencia lo ta e Sintra Portugal Pro cu lo ta e dianan 21 – 27 di september na Praia Grande, mientras Nazare Masters lo ta e dianan september 29 te cu 8 di oktober na Praia De Nort.
Nos atletanan di bodyboard sigur a entrena duro pa e competencia aki y cada un lo defende nos bandera dignamente durante ambos evento mundial na Portugal. Bodyboard ta un deporte hopi practica na Aruba y su federacion, Aruba Bodyboard Association, ta trahando duro pa mantene e nomber di e deporte extremo aki na halto. Den varios competencianan internacional nos representantenan a sa na saca cara logrando premionan grandi manera un Ebrina Curet, Jeremy y Lysander Loefstok, Romar Arendsz, Gregory Wouters y otronan. Rond di nos isla e atletanan di bodyboard ta activo, luganan popular ta Druif, Wariruri, Dos Playa, Anker y na e Bocanan.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di nos atletanan di bodyboard pa e dos competencianan mundial di bodyboard A.P.B. World Tour na Portugal.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
