ORANJESTAD, Aruba - 24 di september, 2015: For di Federacion de Levantamiento de Pesas di Puerto Rico, Aruba Amateur Weightlifting Association a ricibi un invitacion pa participa na e di XXX Torneo Criollo Internacional de Levantamiento de Pesas cu ta tuma luga den e ciudad di Caguas, Puerto Rico for di 29 september pa 4 oktober proximo. Mas cu claro Aruba lo competi cu nan miho atletanan na dicho torneo. Nos isla lo ta bon representa mirando cu nos lo competi den e mayoria categorianan disponibel.
Atletanan di Aruba cu lo competi na e torneo aki ta den categoria 105kg + nos lo haya Ulrich Hoek cu den pasado a triunfa cu un medaya den e torneo aki, mientras den e categoria 105kg nos tin e hoben prospecto Joel Kuiperi, . Pa loke ta e categoria 94kg e semper bataydor Darvin Raphaela lo representa nos dignamente. No por keda sin menciona e hobennan kendenan tambe lo competi den e torneo renombra na Puerto Rico manera un Gerswin Javois cu lo midi forsa den e categoria 69kg, mientras cu den e categoria 62kg nos lo haya representacion di e hoben Zymion Loopstok.
Un di atletanan cu no mester mucho introduccion y cu den pasado a logra gana medaya di Oro den e Torneo Criollo Internacional de Levantamiento de Pesas ta e atleta elite femenino, Jennifer Piter cu lo competi den e categoria 63kg. Como coach di e delegacion lo biaha Patrick Vrolijk y como delegado Hugo Themen. Mester bisa cu e e Torneo Criollo Internacional ta wordo organisa pa di trinta biaha pa e Federacion di Peso di Puerto Rico y Aruba ta participando for di aña 1994 na e torneo aki y a sa di gana varios medaya di Oro, Plata y Brons.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e delegacion di pesas pa e XXX Torneo Criollo Internacional de Levantamiento de Pesas cu lo tuma luga den e ciudad di Caguas, Puerto Rico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
