ORANJESTAD, Aruba – 14 di october, 2015: Recientemente e federacion di volleyball, Aruba Volleyball Association, a inicia cu nan campeonato di volleyball 2015 den e categorianan masculino y femenino. Tur aña e federacion di AVA ta promove e deporte di volleyball bou di nos hoben y adolescentenan cu kier sigui desaroya nan mes den e deporte aki. Es mas, awo tambe e federacion ta trahando duro pa haya mas atleta participa na e deporte di beach volleyball, cual sigur ta un deporte revelacion di e ultimo añanan.
E Federacion di AVA ta conta cu apoyo di un y tur pa promove e deporte di volleyball den tur sentido. Na e campeonato 2015 di AVA a start varios ekiponan masculino y femenino, cual ta un bon señal cu e vision cu e federacion kier logra. Lotto, e loteria di Aruba como instituto hunto cu Comision di Subsidio ta contento di por aporta y brinda e ayudo necesario na e federacion di volleyball pa asina nan por realisa nan campeonato sin ningun obstaculo. Ambos instituto ta kere fielmente den promove cualkier deporte cu lo yuda na haya mas hoben pa bira un atleta y volleyball sigur lo gosa di e sosten aki.
Un danki sigur na Lotto, e Loteria di Aruba pa medio di Comision di Subsidio cu ta subsidia e campeonato di volleyball 2015 organisa pa AVA.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
