ORANJESTAD, Aruba - 14 di october, 2015: Hopi recien un delegacion den e deporte di hisamento di peso a competi den e XXX Torneo Criollo Internacional de Levantamiento de Pesas cu ta tuma luga den e ciudad di Caguas na Puerto Rico. E torneo aki ta uno di nivel halto unda e miho atletanan di pesas den e region di Caribe ta competi contra di otro. Mester bisa cu nos atletanan di pesas a briya durante di e competencia aki unda no menos cu 18 medaya a wordo conkista.
Notabel ta cu Aruba tabata representa den tur categoria disponibel. E hobennan prospecto Zymion Loopstok y Gerswin Javois ambos a logra conkista medaya di brons kibrando nan propio record personal, mientras e atletanan Jennifer Piter y Darvin Raphaela a logra conkista medaya di plata y brons durante e competencia aki. Por ultimo, e atletanan Joel Kuiperi y Ulrich Hoek tambe a logra medaya den nan respectivo categoria unda ambos a logra medayanan di plata y oro. E atleta Joel Kuiperi a logra gana 3 medaya di Plata, mientras e atleta Ulrich Hoek a sobresali y ta logra triunfa cu e premio maximo ganando 3 medaya di Oro pa Aruba. Cu esaki e atletanan di pesas di Aruba a finalisa e campeonato internacional na Puerto Rico cu 18 Medaya di cual 9 di Brons , 6 di Plata y 3 di Oro.
E Torneo Criollo Internacional ta wordo organisa pa di trinta biaha pa e Federacion di Peso di Puerto Rico y Aruba ta participando for di aña 1994 na e torneo aki y a sa di gana varios medaya di Oro, Plata y Brons. Den e ultimo añanan e federacion di pesas ta traha duro na bienestar di nan atletanan, den e diferente torneonan internacional bishita a logra triunfa cu varios titulo. Esaki ta danki na e trabou duro di cada dirigente, coach y mas cu tur cos e propio atleta cu ta sacrifica pa dal un stap mas padilanti cada biaha.
Un palabra di felicitacion ta bini di Lotto, e Loteria di Aruba cu pa medio di Comision di Subsidio ta yuda contribui na e deporte di Aruba y den e caso specifico aki na e delegacion di hisamento di peso cu a logra conkista varios medaya den e XXX Torneo Criollo Internacional de Levantamiento de Pesas na Caguas, Puerto Rico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
