ORANJESTAD, Aruba 29 di october, 2015: Dia 28 di november proximo, e federacion di atletismo, A.A.B. lo organisa un otro competencia esaki en conexion cu e celebracion di ASU Olimpiade 2015. E competencia lo tuma luga den stadion Guillermo Prospero Trinidad. E competencia lo ta riba e distancia largo den diferente categoria. Cuminsando for di e edad di pupilo 4 – 5 aña cu lo tin cu core riba e un distancia di 150 meter te na categoria open cu lo recori un distancia mas largo te cu 1500 meter. Mas cu claro esaki ta den e categorianan femenino y masculino.

Cada aña e ASU Olimpiada a conoce un participacion masal y e aña aki esey no lo bay ta diferente. Tur club di atletismo na Aruba lo participa na ASU Olimpiada 2015. Mester bisa cu hopi mucha, hoben y hende grandi ta practica e deporte di coremento y e parti riba distancia largo a bira masha popular e ultimo cinco añanan.

Un danki sigur na Lotto, e Loteria di Aruba pa medio di Comision di Subsidio cu a subsidia e competencia di atletismo en conexion cu e celebracion di ASU Olimpiade 2015.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.