Oranjestad, Aruba - 30 di october, 2015: E ASU Olimpiada no por wordo celebra sin cu tin un actividad di deporte. Varios federacionnan deportivo miembro di Aruba Sport Unie lo celebra e ASU Olimpiada 2015 e aña aki. Mayoria di nan lo organisa un competencia di un dia pa tur nan atletanan. Dia 31 di October proximo, e federacion di boxeo lo ofrece un tremendo programa boxistico na YMCA San Nicolas cuminsando pa 7.30 di anochi.

Lo tin como 7+ pelea pa mira mientras di nos hermana isla di Corsou lo bini un boxdo. For di Aruba mes lo tin participacion di Jefferson Boxing Gym, Leo's Boxing Gym, Bayolite, Dojo Illidge, Stay Thai Fit, Team Bulldozer. E deporte di boxeo tabata basta activo e aña aki unda a organisa tres evento internacional cu participacion di algun atleta den nos region.

Pa loke ta e peleanan di e anochi nos tin den 91kg: Israel Rivers (14) LBG vs Dylan Nedd (14) JBG, den e klase 57kg: Vladimir kock (17) LBG vs Shane deKort (16) JBG, den 64kg: Edwin Thode (17) LOE vs Daniel Fraser (17) TBZ, den 69kg: Juni Ras TBF vs Efreim Delishaw JBG, den 81kg: Alrick Tromp BBG vs Manny Heil JBG, den 91kg+: David Henriquez JBG vs Gavin Folkes DI, den 91kg+: David Leer TBF vs Patrick Werlman TBF y den e klase 69kg: Joiver Hernandez LEO vr Llyod Hinds Cur

E federacion di boxeo, A.A.B.A. ta trahando duro na e desaroyo di e deporte den su totalidad, no solamente pa e atletanan pero tambe pa e referee y huesnan. Algun tempo atras a organisa un seminario pa referee y huesnan cu e conocido Ray Silvas. Tambe e presidente di e federacion a atende e asamblea general unda a intercambia con pa mehora e deporte di boxeo den nos region.

Un danki sigur na Lotto, e Loteria di Aruba pa medio di Comision di Subsidio cu a subsidia e evento di boxeo enconexion cu e ASU Olimpiada 2015.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.