ORANJESTAD, Aruba 30 di october, 2015: Den cuadro pa engrandece su propio conocemento riba e area di coaching y alabes yuda na e desaroyo di nos hoben atletanan di bowling yega na un nivel mas halto esaki hunto cu e otro coachnan, Sr. Alex Biesum a atende e USBC Coaching Silver Certification Conference na Texas, Merca. E curso tabata tin un duracion di dos dia largo y tabata consisti di entrenamento teoretico y practico, esaki con pa yuda mehora e aspectonan tecnico y tactico di e atleta cu ta practica e deporte di bowling.

Na banda di esaki, Sr. Biesum a ricibi varios material di coaching cu e lo por utilisa durante di su entrenamentonan. E entrenamentonan a tuma luga den e International Training and Research Center ITRC House of TEAM USA y tabata den man di e profesional Stephan Padilla cu ta un Gold Certified. Awor e federacion di bowling di Aruba, ARBAS ta conta cu un otro coach certifica cu un grado mas halto di coaching, esaki sigur lo ta na beneficio di nos atletanan di bowling. Un pabien sigur na Sr. Alex Biesum y e federacion di bowling, ARBAS.

Un danki sigur na Lotto, e Loteria di Aruba pa medio di Comision di Subsidio cu a subsidia e biahe di sr. Alex Biesum pa atende e curso di Silver Certification Coaching na Texas, Merca.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.