ORANJESTAD, Aruba - 12 di september, 2016: E dianan 17 te cu 24 september, e asociacion di bowling Panamericano, PABCON lo tene nan competencia den bowling femenino, e di 17 edicion di e Panamericano Mayores de Boliche na Cali, Colombia. Mester bisa cu Aruba lo competi cu un delegacion femenino bon prepara cu amplio experiencia internacional. E atletanan femenino di bowling lo representa Aruba ta Kamilah Dammers, Thasaina Seraus, Jeadine Luidens, Abigail Dammer, Micheline Jeandor y Giaira Arends, mientras como coach lo biaha Rita Lopez-Henriquez.
Aruba lo mester bataya contra di Bahamas, Brasil, Canada, Chile, Colombia, Costa Rica, Corsou, Dominica, El Salvador, Guatemala, Mexico, Puerto Rico, USA, Venezuela, Bolivia, Ecuador, Virgen Island, Panama y Peru. Tur pais lo bataya pa e campeon Panamericano mientras tin dos clasificacion extra cu lo por lucha pe cu ta e World Bowling Championship Polonia 2017 y e World Bowling Team Championschip Kuwait 2017
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e seleccion femenino di bowling pa e campeonato di 2016 Panamericano Mayores na Cali, Colombia.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
